Bıyl Astanada  8 mektep úsh aýysymda jumys isteıdi. Qala ákimdigi  mektepterdiń úsh aýysymda jumys isteýin halyq sanynyń kóbeıýimen túsindirip otyr.

"Demografıalyq jáne kóshi-qon prosesteri esebinen oqýshylar kontıngentiniń jyl saıynǵy ósýine baılanysty búginde qala boıynsha 8 mektep úsh aýysymdyq rejımde jumys isteıdi. 2025 jylǵa deıin oqýshylardyń oryn tapshylyǵy máselelerin sheshýge arnalǵan «Jaıly mektep» ulttyq pılottyq jobasyn iske asyrý aıasynda elordada 44 400 oryndyq 24 mektep salý josparlanǵan", – delingen resmı jaýapta.

Bul týraly  Halyq Uni portaly habarlady. Atap aıtqanda,  №27 mektep-lıseıi, № 37 orta mektebi, № 53 mektep-lıseıi, № 59 mektep-lıseıi, № 79 mektep-lıseıi, № 83 mektep-gımnazıasy, № 85 mektep-lıseıi, № 89 mektep-lıseıi úsh aýysymda bala oqytady.

Ákimdiktiń habarlaýynsha, mektep máselesin sheshýge 76,9 mlrd teńge bólingen.

"2023 jyly eki aýysymda 16 600 oryndyq 11 mektep  qurylysyn aıaqtap, paıdalanýǵa berýdi josparlap otyrmyz. Bilim berý ınfraqurylymyn qoldaý qorynan 21,9 mlrd teńgege 10 mekteptiń qurylysy qarjylandyrylady", – deıdi Astana ákimdiginiń baspasóz qyzmeti. 

Eske sala keteıik, Astanada jalpy bilim beretin 101 memlekettik mektep bar, sonyń ishinde 35 qazaq, 3 orys jáne 63 aralas mektep bar.